Efano lomahepeko.
Author: Ndinoshiho, Etoloko kuRauna
Pub Date: 06/01/2008
Publication: Name: Sister Namibia Publisher: Sister Namibia Audience: Academic; General Format: Magazine/Journal Subject: Social sciences; Women's issues/gender studies Copyright: COPYRIGHT 2008 Sister Namibia ISSN: 1026-9126
Issue: Date: June, 2008 Source Volume: 20 Source Issue: 2
Accession Number: 184550002
Full Text: MuOktoba 2007, Gudrun Kober, ha longo koPEACE Centre okwa ningile omakonakono aimwe yomoyeetifi yomahepeko moNamibia nokwa li ei yandja mosheetwapo shaye osho a etele po koUnivesiti yaNamibia. Helen Vale okwa li a ngonga omanenediladilo omosheetwapo osho moitukulwa ivali oyo tai ka nyanyangidwa moshifo shedina Sister Namibia. Moshikando shotete, ohatu ka tala koyeetifi yomahepeko pandodo yoohandimwe, pamakwatafano novanhu vamwe, movanamukunda nomoshilongo ashishe.

Moshikando tashi landula ohatu ka tala koilonga youkashike, yeliko noyondjokonona moku shi talela momahepeko.

Ehangano lOundjolowele mOunyuni (WHO) ola fatulula omahepeko kutya "Elongifo leenghono nomake tali ningwa nelalakano, taku ningwa omatilito ile tashi ningwa shili, to e liningile mwene ile to a ningile ongudu yovanhu nelalakano lokuyehameka, okweetifa efyo, okuyehameka kwomomadiladilo, okukula kwa kambela ile okwaanyenwa oufemba wonhumba." Omushangwahokololo wEhangano lOundjolowele mOunyuni (WHO) u na sha nOundjolowele nOmahepeko otau kendabal; okunda ko oitukulwa ihapu yomaukwatya omahepeko mokutaalela cendodo nhee da yooloka - ondodo yoohandimwe, yomakwatafano pokati kovanhu, yovanamikunda noyovakwashiwana aveshe. Ngeenge hatu tale kombinga yomahepeko moNamibia, oshiwa ngeenge hatu longifa omikalo edi mokundjadjukununa nokukonakona oyeetifi yomahepeko ponghatu keshe.

Omahepeko ponghatu yoohandimwe

Oyeetifi i na omwenyo osho yo ondjokonona yomunhu otai dulu okunwefa mo omunhu a ninge epuko ile a ninge oshihakanwa shomahepeko. Oihopaenenwa yoyeetifi yomahepeko oohandimwe oya kwatela mo omapiyaano omomadiladilo, ondjokonona yomalihumbato a nyika ouxwapindi osho yo ngeege omunhu okwa ningile oshihakanwa shomahepeko. Osha shiivika yo nawa kutya elongifo loikolwifa oli li oupyakadi wa tanda ko mOvanamibia vahapu.

Omahepeko momakwatafano pokati kovanhu

Omalihumbato a nyika ouxwapindi nao ohaa nwefwa mo komakwatafano opokati keefamili, koomakula nokookaume. Oinima ei hai nwefa mo omahepeko pandodo ei otai dulu okukwatela mo omhumbwe yomakwatafano a kola nohole meefamili, omashilafano nomahepekafano pokati kovadali, omayehameko opalutu anghi-na-nghenda ounona nomakwatafano ounona neengudu dovapiyaaneki.

Oyeetifi yopehovelo ci tai hapupalifa oupyakadi womahepeko opamakwatafano oya kwatela mo okupangela omalihumbato kwa nghundipala, okulidina, omalihumbato ehe li melandulafano, omhumbwe yekwatafano la kola mofamili omu wa putukila, nokumona omahepeko omomaumbo peedula dopetameko.

Eshiivo, eenghalo, oilonga nelihongo lomalihumbato kombinga yo HIV no AIDS lo 2006 ola pitifa ouyelele umwe wokombinga yomakwatafano oo wa monika kounona nokovanyasha moitukulwa imwe yaNamibia. Konyala eepelesenda 45 dounona oda mona ovakulunhu vavo tava nu ile va kolwa momaumbo, ofimbo eepelesenda 35 dounona da mona ovakulunhu vavo tava hanyenafana. Eepelesenda dounona di dule 20 oda mona ooxe tava denge ooina ofimbo eepelesenda dounona 16 da mona umwe womovadali a ulikwa ondjebo.

Ngaashi sha tongwa nale kutya ope na ekwatafano lakula pokati komashilafano ovakulunhu pefimbo lokounona nomahepeko pefimbo lounyasha noloukulunhu, eyopombada lomahepekafano ovakulunhu otali limbililike. Etomheno likwao tali lipulwa nalo oleli kutya ounona ovo hava mono omashilafano opokati kovakulunhu vavo ovo yo hava tekulwa nonyanya. Sho vali omahepeko oo haa ningwa komunhu wopopepi naave okwa monika kutya otaa hapupaleke onghalo younona va ka kale va hepekwa nomalaka, kolutu nokomwenyo.

Omapekapeko omo 2004 oo a ningilwe kOvalihongi vOundjolowele mOunyuni, okwa ulika nokutya etonatelo lounona Ounamibia vomido di li pokati 13 fiyo 15 ola ngabekwa. Oshinima osho otashi limbililike neenghono molwaashi okuhatonatelwa kwounona kovakulunhu vavo okwa kwatakanifwa kumwe noilonga yomahepeko pefimbo lounyasha noloukulunhu.

Omikifi ngaashi o HIV/AIDS ohadi dulu okweetifa ehapupalo lomahepeko omounyasha. Eshi ovakulunhu tava fi po, efiloshisho lovakulunhu itali dulu vali okukala po nomitungilo deefamili ohadi hanauka po. O HIV no AIDS ohai eta oudjuu wopaliko; oshidjuu okuya onhapo oluhepo eli ngeenge ounona otava fiye po eefikola vaka pashukile ovakulunhu vavo ovo tava vele notava fi. Ounona ovo tava kendabala okulimonena ouxupilo ova kwatelwa mongudu yovakwanaluhepo shaashi eenghono davo oda ngabekwa, notashi yandje omhito opo va ka hepekwe kovayandji voilonga ovo ve li ovafukedi.

Okutondolwa oko omukalo mukwao womahepeko oo tau naipikwa komukifi wo HIV/AIDS. Mopaife ope na omitungilo dipe deefamili ngaashi eefamili odo di na ounona ovo ve li omitwe domaumbo odo tashi dulika di yandje eemhito domakwatafano mawa, eyambidido netonatelo lomoukumwe, odo da talwa ko ongadimwe domomikalo odo tadi shunifa pedu omahepeko.

Omahepeko pandodo yopamukunda

Oyeetifi yomahepeko pandodo yopamukunda oyo tai hapupaleke oupyakadi womahepeko oya kwatela mo oupyakadi wokuhenoilonga oo u li pombada neenghono, omayooloko makula moyuuyemo, oluhepo, omivalu dinene dovakwashiwana voyuuyemo i li pedu, sha hala okutya ope na omhumbwe yomhepo yelongelokumwe movanamukunda. Oyeetifi ei otai dulu okutalwa ko tai dana onghandangala meenghalo ngaashi domeefikola, momihandjo, moipangelo nomeenhele doilonga.

Eefikola otadi dulu okulepeka ekalepo lomahepeko ponhele yokukala eenhele opo ovanyasha tava dulu okulihonga omikalo diwa dokukandula po omashilafano. Palopota yomo 2003 i na sha nOmahepeko Ounona Opakuya Momilele no HIV: Elihongo lomakwatafano moSouth Afrika nomoNamibia, ola ulika kutya kakele kovapambele ovalumenhu, ovamati vavo novashiivikile vavo, ovanhu vakwao ovo ve na eepoosa (oupundi) dopombada, naunene ovahongi, ovo unene hava hepeke ounona.

Omikalo domalihumbato edi da tulwa po kovanamukunda nado otadi dana onghandangala momahepeko. Oshihopaenenwa, eenghundafana dovanamukunda di na sha noonakunyona osho yo oihakanwa yomahepeko moNamibia ngaashi ya ningwa molopota i na sha nOmahepeko Ounona Opakuya Momilele no HIV oya holola omalimbililo nokai li pauyuuki. Nonande pa li eudafano kutya omahepeko ounona opakuya momilele oku li oupyakadi wakula noonakuhepeka ounona pamukalo ou kakwa li tava dulu okutambulwa ko, ounona vahapu va hepekwa pamukalo ou ohava pelwa oushima omahepeko oo va ningilwa nohava dengwa nokuli kovadali vavo ngeenge ve va hololele osho va ningilwa. Ovakaulinyanga vahapu ohava pewa eyambidido keefamili davo, kookaume nokovanamukunda wavo. Ovashangi volopota i na sha nOmahepeko Ounona Opakuya momilele no HIV ova yandja elondwelo kutya oinima ei ihe shi okutambulwa ko oyo tai kaleke po oupyakadi womahepeko ounona e na sha nokuya momilele.

Omahepeko moshiwana shetu

Oyeetifi yomahepeko yopashiwana ya mbwalangadja ei i li pefina lomahepeko oya kwatela mo omikalo odo da tambula ko elongifo lomahepeko ongomukalo wokulonga nomashilafano, osho yo omilandu dopanghalafano, dopaliko nodopahongo odo tadi kaleke po okuhefikepamwe kwopanghalafano.

Natu yandje oshihopaenenwa shomoNamibia, omahepeko ohaa ningwa luhapu moiputudilo yaaveshe,

EKWATONGHONGA

Omunhu umwe wopmovakainhu vatano ota ka ninga oshihakanwa shekwatonghonga ile a ka kale hanga a kwatelwe onghonga monghalamwenyo yaye.

[ILLUSTRATION OMITTED]

Okakalata haka tumwa mopoosa notaka andjakanekwa paimeila ka totwa po kOiwana ya hangana nelalakano lokupapudula ovanhu kombinga yeendodo domahepeko oukadona novakulukadi odo di li pombada neenghono moiwana ihapu mounyuni. oshihopaenenwa omOuministeli wEameno, omo kwa didilikwa nawa kutya ovapolifi ohava denge oonakufekelwa, nomafimbo amwe ohave va dipaa nokuli. MOuministeli wOundjolowele nOnghalonawa hanale unene eshi kwa monika kutya oundjolowele wovakwashiwana Ovanamibia itau filwa oshisho nawa, unene tuu wovanaudu ovo va dja meengudu dovanhu ovo ve li moluhepo, naunene tuu ovo ve na ombuto yo HIV no AIDS. Ovanhu ava luhapu ohava holola nghee tava hepekwa keemwenyo kovapangi.

Omikalo dopashiwana da pamba efiloshisho lokaana nado otadi dana onghandangala yakula mokulepeka omahepeko. Omikalo edi omatimbo amwe ohadi yandje omanwefemo, nokudja opo otadi shiivifile oveta. Momushangwahokololo wounyuni omo tamu popiwa kombinga yomahepeko haa ningilwa ounona omwa ulikwa kutya mounyuni aushe, mahapu omomahepeko oo haa ningilwa ounona oku li paveta, a pitikwa kepangelo nokwa diminwa panghalafano. Onghalo ei opo i li nande oya kwatela mo enyonauno leernhumbwe dounona dopakukula, nomapangelo oku na oinakuwanifwa yomaufemba opanhu. Ope na eshongo eli la pumbwa okulundululwa moshitukulwa omu shaashi omahepeko oo haa ningilwa ounona luhapu ohaa tambulwa ko 'ongoshinima shopamufyuululwakalo' ile a talwe ko 'ongomukalo wedulikifo'.

Oshitukulwa (oshitivali) 2 shefano lomahepeko otashi ka nyanyangidwa moshifo sha Sister Namibia tashi shikula.

RELATED ARTICLE: Otaku kongwa ovakufimbinga

Omapekapeko opaukashike nOprojeka yOvapopili voLegal Assistance Centre otai ningi oyoongaleleilonga moshilongo ashishe tai pula epulo, 'Omolwashike ondodo yomahepeko ya londa unene moNamibia?' Oyoongaleleilonga otai lalakanene okuya moule woshinima shi dulife pomanyamukulo oo taa ka yandjwa kepulo eli, nokutota po oilonga yovanamukunda opo va ungaunge noupyakadi ou.

Ngeenge owa hala okukufa ombinga muimwe yomoyoongaleleilonga ei, kwatafana naRachel Coomer, kutya nee opaimeila: rcoomer@lac.org.na ile u mu shangele kondjukifi ei P O Box 604, Windhoek. Momukanda woye, kwatela mo edina loye, onhele apa ho di naapa to dulu okukwatafanwa naave noupu. Ovaningi vomaindilo ashike ava va diminwa tava ka kwatafanwa navo. Ovanhu ovo va dja momikunda odo opo tadi putuka ovo tava ka talwa tete.
Gale Copyright: Copyright 2008 Gale, Cengage Learning. All rights reserved.