Efano lomahepeko: oshitukulwa 2.
Author: Ndinoshiho, Etoloko kuRauna
Pub Date: 08/01/2008
Publication: Name: Sister Namibia Publisher: Sister Namibia Audience: Academic; General Format: Magazine/Journal Subject: Social sciences; Women's issues/gender studies Copyright: COPYRIGHT 2008 Sister Namibia ISSN: 1026-9126
Issue: Date: August, 2008 Source Volume: 20 Source Issue: 3
Accession Number: 188293334
Full Text: MuOktoba 2007, Gudrun Kober wokoPEACE Centre okwa li a ninga omakonakono oinima oyo i li omidi doyeetifi yomahepeko moNamibia mosheetwapo osho a ningile koUnivesiti yaNamibia. Helen Vale okwa li a ngonga omanenediladilo osheetwapo osho noshitukulwa shotete osha li sha nyanyangidwa moshifo shedina Sister Namibia. Moshitukulwa sha dja ko, otwa li twa tala koyeetifi yomahepeko pamufika wopauhandimwe, wopamakwatafano, wopamukunda nowopashiwana. Moshinyolwa eshi shopaife, ohatu ka tala koilonga yovadali, youkashike, yeliko nondjokonona yomahepeko.

Okudenga omunhu nako omukalo womahepeko

MoNamibia, omu na oveta oyo ya pa "ovadali eenghono" odo da kwatela mo oufemba wokuyandja "omahandukilo e shi okulididimikilwa" kounona. Ashike nande ongaho, ngaashi sha ulikwa mOlopota yOunyuni i na sha nOundjolowele nOmahepeko oyo ya ningwa koWorld Health Organisation (WHO), omikalo odo da yandja oufemba kovadali u na sha nonghalonawa younoua odi li mongudu yoinima oyo ya talwa ongaimwe yomoyeetifi yomahepeko.

Pamapekapeko oo natango inaa nyanyangidwa a ningilwe momudo 1996 oo a kwatela mo eenghundafana da ningilwe koungudu vovanhu mOvenduka, mOmalinda nokoitukulwa yokoumbangalanhu waNamibia, osha monika mo kutya edengo oshinima osho hashi holoka efiku keshe meefamili dihapu nola talika ko ongomukalo dingi wokudulikifa ovanhu, navahapu vomovakufimbinga momapekapeko omo ova ulika kutya kave shii po vali omikalo dimwe di lili dokudulikifa ounona.

Monena ounona Ounamibia ova amenwa kokuningwa nai paveta ngaashi sha ulikwa mOveta yOunona Yonomola 33 (1960) nomokatendo 95 kEfinamhango. Efiloshisho lOkaana nOnhotwaveta yEameno okwa teelelwa i ka pingene po Oveta yOunona. Ekondjifo lOmahepeko Omomaumbo Paveta (2003) nalo ola yandja eameno lonhumba.

Omulandu wEhongo lOmalihumbato waNamibia otau kelele omukalo wedengo lounona meefikola nande ovahongi vahapu have shi ningi natango. Edengo inali pitikwa okuningwa paveta ongomukalo wokuhandukila omunyoni osho yo li longifwe ngeno ongomukalo wokudulikifa ounona moiputudilohongo. Moiputudilohongo ikwao nomeenhele dokufila oshisho ounona odo da yandjwa kepangelo, edengo ola indikwa filufili. Ashike nande ongaho, okudenga ounona okwa talika ko ongomukalo u li mondjila wokudulikifa ounona kovakwashiwana vahapu.

Omikalo dopaukashike otadi etifa omahepeko

Mokati komikalo dopanghalafano odo tadi hapupaleke omahepeko moNamibia omwa kwatelwa odo da pamba oukashike. Oshihopaenenwa, ovalumenhu ovanyasha ova li ve na okukala ve na eshiivo la wana nolefimbo lile osho yo omukumo nomatokolo moinima ya pamba oukashike. Nomolwaasho, eenghono dopaukashike nomakwatafano omeholeko mahapu oku li mouwa wovalumenhu ovanyasha. Ouyelele oo wa kufwa momapekapeko oWHO e na sha nElihongo lomOilongo Ihapu li na sha nOundjolowele wOvakainhu nOmahepeko Omomaumbo (2005), owa holola kutya ovanhu vomwaalu weepelesenda 6 dovakufimbinga Ovanamibia ova holola kutya ova ningilwa omahepeko opakuya momilele ve a ningilwa komunhu ehe shi omuholike waye, ofimbo ovanhu vomwaalu weepelesenda 55 va ningilwa omahepeko opakuya momilele ve a ningilwa kovaholike vavo. Ediladilo eli la itavelwa mokati kovalumenhu ovanyasha oleli kutya okuningila ovakainhu omahepeko oo omukalo wokuulika eenghono doshilumenhu. Ediladilo likwao, olo la itavelwa kovakainhu vamwe nomafimbo amwe ohali longifwa ongomukalo wokulipopila kwaavo va kwata ovanhu keenghono ololo kutya omahalo ovalumenhu ihaa dulu okupangelwa.

Ope na oinima ya kanghamekelwa koukashike oyo luhapu hai ningifa ovalumenhu oihakanwa yoku va twalifa mokuhepeka ovakainhu. Omulumenhu Omuafrika oha talwa a fimana ngeenge omukengeli. Eshi ohashi mu pe elifikameno lokutota po ofamili yaye mwene, osho ovakwashiwana ve shi tala ko ongoshinima sha fimana komulumenhu. Shikwao vali, ovalumenhu ovo vehe na oilonga ile ihava longele oshimaliwa ova talwa ko va kambela noinava tambulwa ko panghalafano, noulumenhu wavo ihau kala wa valulwa. Ngeenge omulumenhu okwe lihange monghalo ya tya ngaho nena ohashi mu twala ponghatu yokulonga oilonga ya nyama komahepeko.

Pauyelele wa wedwa ko, otashi dulika shi yelifwe kutya monghalo yaNamibia, omo mu na omivalu dovanhu vehe na oilonga osho yo dovanailonga hava mono oyuuyemo yomwaalu u li pedu da londa pombada, ovanailonga aveshe kumwe ovakainhu novalumenhu ove li moupyakadi wokuhepekwa kovayandji vavo voilonga. Natango vali, oipambele yokulongifa eenghono moilonga ohai talwa ko ihe li mondjila osho hashi etifwa kovanailonga vahapu ovo vehe na eshiivo loilonga la wana nawa, nomolwaasho ohava dulu okupingenwa po noupu.

Meenghalo da tya ngaho oshinima sha fimana osho okwaamena nokuyambidida ovanailonga. Nande ongaho, omukalo weyambidido lopamufyuululwakalo otau dulu okukala wa findilwa pedu koinima ngaashi omukifi wo HIV, nomolwaasho omahepeko otaa ende taa hapupala.

Omayooloko moyuuyemo nomahepeko

Omapekapeko opaiwana okwa mona kutya omahepeko nomayooloko omoyuuyemo oyo imwe yomoinima oyo ya pumbwa okutalwa nawa. Omakonakono oo a ningwa moilongo ei ya putuka naai opo tai putuka okwa ulika kutya omwaka oo u li pokati koyuuyemo yovanhu otau kwatakanifwa kumwe neyopombada lomalidipao.

Namibia okwa kumwa neenghono komashingifo nokeyopombada louhefikepamwe, nokwa talika ko e na omwaka wakula mouuyuni pokati kovakengeli novafyoona. Palopota yo WHO yOlopota yOunyuni i na sha nOmahepeko nOundjolowele, osha konekwa kutya okuhefikepamwe oku otaku dulu okuhapupaleka omahepeko opamakwatafano. Osha monika yo kutya, omakondololo opanghalafano oo e li po nale otaa dulu okududwa mo meendelelo noinape ya oilanduli yasha.

Ngeenge hatu popi natango kombinga younene womayooloko omoyuuyemo, okudja pemanguluko mol990, Namibia okwa konekwa a eta po omalunduluko opanghalafano taa endelele neenghono mwa kwatelwa yo netotepo leeveta dipe odo tadi pula efrkifopamwe leenghono pokati kovalumenhu novakainhu, ounona novakulunhu. Opa didilikwa yo omalunduluko taa endelele movanhu naunene tuu movanyasha, mokunawapeka eenhele, mokutembuka, okuninga eenhele eedoolopa nokulundulula omilandu dopanghalafano, oyo aishe ya kala ya kwatakanifwa kumwe nehapupalo lomahepeko ovanyasha.

[ILLUSTRATION OMITTED]

Omapiyaano onale

Moilongo ihapu oyo ya mona oixuna komashilafano, omivalu domahepeko opamakwatafano odi li pombada natango nande omaupyakadi a xula po - shaashi omapiyaano okwa kala a tambulwa ko panghalafano yo vali oilwifo ove i na natango. Oshinima shikwao shi li po natango omahepeko a longekidwa nawa. MuNamibia, omulandu wokatongotongo oo kwa li tau longifwa kepangelo laSouth Afrika pokati komudo 1948 ne 1990 oo oshihopaenenwa shomahepeko a longekidwa nawa. Otashi dulika shi talwe ko ngaha kutya nande oshilongo osha tula po epangelo lipe, omhepo yokatongo inya ya li tai longifwa kepangelo loukoloni onghee ngoo natango tai yandje enwefemo la kula momahepeko omaludi aeshe moNamibia.

Exulifo

Omahepeko ohaa dulu okuningwa pamikalo dihapu, mwa kwatelwa omikalo doohandimwe, dopamakwatafano, dovanamukunda nodovakwashiwana. Ekwatafano pokati koyeetifi yomahepeko opauhandimwe naai yopanghalafano ya mbwalangadja, yopashiwana noyopaliko ola faneka kutya okutaalela oinima ei ya nyika oupyakadi pamifika da yooloka otashi shunifa pedu omahepeko e dule pulimwe.

Oshihopaenenwa, nonande omayele oo a dingilila oukashike otaa longo oshilonga shakula momahepeko oo tu wete nena, pashiAfrika ope na oinima ihapu oyo itai piyaaneke moukwatya wovalumenhu. Otashi ka kala sha fimana ngeenge taku ningwa omakonakono nokuxwaxwameka omaukwatya oshilumenhu osho yo oinima yopamufyuululwakalo moNamibia. Omilandu dehongo odo da kwatela mo okuhefikepamwe nado oshinima shopashiwana sha kwatakanekwa komahepeko. Nande ongaho, osha monika mo kutya etulomoilonga leeprograma deekinda oshinima tashi wapalele mokukelela omahepeko mounona. Eeprograma edi otadi pe ounona omhito ve lihonge omaunghulungu oo va pumbwa okulihongwa peedula dopetameko, nomolwaasho otadi xwepopeke eemhito dounona va tya ngaho va ka findane melihongo lavo nopamaxupilo. Natango, eeprograma edi odi na eenghono dokuxwepopeka elitambulekomwene lokaana, osho tashi dulu okutwalifa meshunopedu lomahepeko opamakwatafano.

Okudja mwaaishe ya tumbulwa pombada, osha, yela kutya omahepeko okwa londa pombada moNamibia. Otashi ka kala eshongo la kula kOvanamibia aveshe ve lihonge nhumbi tava taalele oshinima shomahepeko kuvo vene, momakwatafano avo, momikunda davo nomoshiwana shavo. Ngeenge otwa findi omahepeko, ongushu yonghalamwenyo yetu atushe otai ka xwepopala.
Gale Copyright: Copyright 2008 Gale, Cengage Learning. All rights reserved.